Luke 6

Mowi Kor Ui Ila Kongun Mi Rormin Uⱡ Ei Nga Jisas Ndi Nitim

1Mowi kor ui ti kᵾn, Jisas kᵾn elim nga kitip kᵾni wu ni kᵾⱡ kᵾn, wit pana rᵾk ting tila purung. Kitip kᵾni wu ni kᵾⱡ ndi, puk mel, wit mong nimbᵾ, oldᵾk tᵾk, ambulk mitᵾk roⱡina, kᵾng mbᵾ puⱡnga, mong mbᵾ nok purung. 2Uⱡ etᵾng ni, Perisi wu mbᵾ ndi kandᵾk, nᵾk mel, “Uⱡ kᵾⱡ, Mowi Kor ui ei kᵾn, tᵾn nga mi ik ei ndi, mon nᵾtᵾm ndi, nambuⱡ emel enmin?” nᵾtᵾng. 3Wote Jisas ndi, Perisi wu kᵾⱡ nga nᵾtᵾng ik ni, punt ropa nimba mel, “Enim ndi, Depit nga timan ropa pinditim kᵾⱡ, kᵾmp rok kᵾni nakᵾndᵾrmin ei? Unt Depit kᵾn, el elim nga wu rᵾⱡaip kᵾⱡ kᵾn, kump kun kurung ei kᵾn, Depit ndi, Got nga manga ila mukᵾr mba, Got kᵾn angge nᵾk, bret tetmin mbᵾ titim. Bret kᵾⱡ, wu pris mbᵾ mint normin. Wamp mbᵾ, mi rok mon nᵾtmin. Wote Depit ndi, bret mbᵾ, tᵾpa nomba, wote elim nga wu rᵾⱡaip mbᵾ, mok ropa ngumba itim ku,” nitim. 5Wote Jisas ndi, ik ti nimba mel, “Muⱡᵾl Wu Kupa ei ndi, Mowi Kor ui ei, rᵾp etᵾm!’ nitim.

Mowi Kor Ui Ei Kᵾn, Jisas Ndi, Ki Rumbrᵾm Wu Ti Etpa Titim

6Mowi kor ui ti kᵾn, Jisas ndi mba, atinga manga kel nila mba, wamp ik mbo endpa murum. Manga nila wu ti murum ei nga, ki mbo orunga kit itim. 7Wote, ik mbo wu mat kᵾn, Perisi wu na nimbᵾ ndi, Jisas tᵾk kongundᵾk morung. Ei nambuⱡ emel, Mowi Kor ui ei kᵾn, Jisas ndi, kui wamp mbᵾ, etpa tᵾm ndam, Jisas kot indimin nᵾk pilik, nokundᵾk morung. 8Wote, wu kᵾⱡ nga pᵾtᵾng numan ni, Jisas ndi, pilpa pora ndupa kᵾn, ki rumbrᵾm wu ni, kundpa nimba mel, “Nim ya wamp mbᵾ nga kuimp keta ila, oⱡa ᵾnggᵾli!” nitim. Wote wu ni, oⱡa ᵾnggᵾtᵾm. 9Jisas ndi, wamp mbᵾ, kundpa nimba mel, “Na ndi, enim ik ti wuldimp ent. Tᵾn nga mi ik ei ndi, tᵾn Mowi Kor ui ei kᵾn, namba uⱡ mbᵾ, itᵾmin nᵾtᵾm? Uⱡ kit mbᵾ, itᵾmin nᵾtᵾm, muna uⱡ kai mbᵾ itᵾmin nᵾtᵾm nda? Tᵾn ndi, wamp mbᵾ, tᵾpᵾn rapundpᵾn, etpᵾn kai itᵾmin nᵾtᵾm, muna wamp mbᵾ, etᵾp kit mundmin nᵾtᵾm nda?” nitim. 10Jisas ndi, wamp morung nimbᵾ, kandpa pok etpa kᵾn, ki rumbrᵾm wu ni, kundpa nimba mel, “Nim nga ki ei tᵾkᵾn, run ndui!” nitim. I nilinga, wu ni nga ki ni tᵾpa, run nduⱡnga, omba kun purum. 11Wote, mi ik mbo wu nimbᵾ kᵾn, Perisi wu na nimbᵾ, popᵾⱡ ndi kolk, en enim nᵾk, int yant etᵾk nᵾk mel, “Tᵾn ndi, Jisas ni wu ei, namba uⱡ ti itmin nda,” nᵾtᵾng.

Jisas Ndi, Nombuⱡa Rung Wu 12 Kat Kᵾmp Ropa Titim

12Ui ei kᵾn, Jisas ni, elim Got kᵾn atinga ruimp nimba, komnga nila purum. Mba, rumbuldi atinga ropa moⱡnga, kona ni rᵾnggᵾrᵾm. 13Kona ranggᵾpa, ant kuimp oⱡnga, Jisas ndi, elim nga kitip kᵾni wu nimbᵾ, wi ropa rᵾk tᵾpa mondpa, elim nga kitip kᵾni wu 12 kat, nombuⱡa rung wu nimba, mbi tepa ngurum. 14Wu ti nga mbi Saimon, wote Jisas ndi, wu ei, mbi tepa, Pita nitim. Ei nga, ᵾngᵾn Andru kᵾn, Jeims, Jon, Pilip, Bartolomiyu, Matyu, Tomas, wu Alpiyas kangᵾm Jeims, Saimon ni, wu Selot rᵾⱡaip kᵾⱡ nga. 16Jeims kangᵾm Juras, Juras Iskariyot ni wu ei, wote Jisas ruk moⱡpa itim wu ei.

Jisas Ndi, Wamp Ou Ndupa Etpa Titim

17Wote Jisas kᵾn, elim nga kitip kᵾni wu ni kᵾⱡ kᵾn, komnga morung ni, wak rok, kelik mana ok, kona kai tila morung. Wamp puⱡi, Jura kona na, Jerusalem kona peng na, Tair kᵾn, Sairon kona raⱡ nga nondpa, nu wung ila na, petmin wamp mbᵾ pora, ok morung. 18Wamp orung mbᵾ, Jisas nga ik nitim mbᵾ, kum tek pilik, kui rurum wamp mbᵾ, Jisas ndi, etpa tangga nᵾk, wote kur kit rukᵾr orunga murum wamp mbᵾ, etpa tangga nᵾk orung. 19Wote, wamp mbᵾ nga ki mbᵾ ndi pora, Jisas ni, minda ndᵾmin nᵾk pilik etᵾng. Ei nambuⱡ emel, kui wamp mbᵾ ndi, Jisas minda ndurᵾng ei kᵾn, Jisas nga ronduⱡ ei ndi, kui rurum wamp mbᵾ, etpa titim.

Jisas Ndi, Wamp Numan Kai Piling, Wote Wamp Mat Kai Ting Nitim

20Jisas ndi, elim nga kitip kᵾni wu kᵾⱡ, kundpa nimba mel, “Enim wamp kurpa mbᵾ, numan wang ndᵾi, Got nga wamp tᵾpa mumuk rui uⱡ ei, enim nga mint. 21Enim akup kump kun ndi kormᵾn wamp mbᵾ, numan wang ndᵾi! Wote ei kᵾn, enim rᵾng nangina, pilᵾng etmba. Enim akup ka etᵾk mormᵾn wamp kᵾⱡ, numan wang ndᵾi! Wote ei kᵾn, enim oi iting. 22Enim ndi, Muⱡᵾl Wu Kupa ei nga uⱡ mbᵾ, pep rok pangina kandᵾk kᵾn, wamp mbᵾ ndi, enim kᵾn numan kit piling. Wamp mbᵾ ndi, enim makrᵾk mundᵾk, ik kit nᵾk ngᵾk iting. Wote, wamp mbᵾ ndi, enim nga mbi ei, nᵾk kit munding. Uⱡ mbᵾ mel, enim kᵾn om ndam, enim numan wang nduk muⱡᵾi! 23Wamp mbᵾ ndi, enim kᵾn uⱡ kit mbᵾ eng ndam, enim ambulk palk numan kai pilik muⱡᵾi! Enim nga mel mam kai mat, muⱡ kona ila tinditim ei tetᵾm. Nambuⱡ emel, wamp mbᵾ nga anda kouwᵾmin mbᵾ ndi, uⱡ ei mel ku, painui wu mbᵾ kᵾn etᵾng. 24Enim kng mel pi wamp mbᵾ, akup pilik kun etᵾk muⱡᵾi! Enim wi muⱡ kona ila ting mel ei, ya mᵾi kona ila tᵾk pora ndurmin. 25Akup enim rᵾng nok pilᵾng kundᵾk mormin wamp mbᵾ, pilik kun etᵾk muⱡᵾi! Wote, enim kump kun kuⱡing. Akup enim oi etᵾk mormᵾn wamp mbᵾ, pilik kun etᵾk muⱡᵾi! Wote, enim ka itangina, ka nu mel omba mba. 26Wamp mbᵾ, ndi, enim nga kᵾng orunga mbi paka rok, mek oⱡa pung ndam, pilik kun etᵾk muⱡᵾi! Nambuⱡ emel, wamp mbᵾ nga unt nga anda kouwᵾmin mbᵾ ndi, i ku etᵾk, ik kol rok painui wu mbᵾ nga kaip nᵾndᵾtᵾng.

El Puⱡa Wamp Numan Ngui Uⱡ Ei Nga

27Wote Jisas ndi, aldpa nimba mel, “Na nga ik nᵾnt ei kum tepa pilim wamp ei ndi, el puⱡa wamp mbᵾ, numan ngangga, nim kᵾn, ik kit nim wamp ei, uⱡ kai mbᵾ etkᵾn ngui! 28Wamp mat ndi, enim ik mura ngᵾng ndam, enim ndi, wamp ei, Got ndi, memp pindangga nᵾi! Wote, wamp ti ndi, enim rom ndam, wamp ei nga, Got kᵾn atinga rundᵾi! 29Wamp ti ndi, nim ki ⱡᵾrwᵾ ndi rom ndam, wote keng orunga nont ndana pendpa rangga! Wamp ti ndi, nim nga wal pᵾki ekit orunga kᵾⱡ tᵾm ndam, wote wal pᵾki rukᵾr kᵾⱡ kunda tangga, kandkᵾn kui iti! 30Wamp mat ndi, nim mel mat mawa eng ndam, mawa eng mel mbᵾ ngui! Wamp ti ndi, nim nga mel mat roldpa tᵾm ndam, wote mel mbᵾ, nim yant ndupa ngangga nᵾkᵾn, mawa iti nᵾti! 31Wote, wamp mat ndi, enim nga uⱡ mat, indeing nᵾk numan pᵾtmᵾn ei mel ku, enim ndi, wamp mbᵾ nga ei mel ku indᵾi! 32Wamp mat, enim numan ngᵾng mbᵾ mint, pep rok numan ngᵾng ndam, memp kai ei, etᵾk ting mel nant? Uⱡ kit etmin wamp mbᵾ ndi, ku etᵾk, en enim numan ngurmin wamp mbᵾ, pep rok numan ku ngurmin. 33Wamp mat, enim kᵾn uⱡ kai eng wamp mbᵾ kᵾn, pep rok, uⱡ kai mbᵾ mint eng ndam, enim memp kai ei etᵾk ting mel nant? Uⱡ kit etmin wamp kᵾⱡ, uⱡ to tenda ei mel ku etmin. 34Enim ndi, wamp mat mel mbᵾ, ngurmin uⱡ ei, enim punt rok, yant ngeing mint nᵾk pilik etmin. Wote, enim memp kai ei, etᵾk ting mel nant? Uⱡ kit etmin wamp mbᵾ ndi, ei mel ku etᵾk mel mbᵾ, wamp mat, punt mondᵾk ngᵾk kᵾn, wote punt rok, ngeing mint nᵾk pilik etmin. 35Ei mon, enim nga el puⱡa wamp mbᵾ, numan minal ngᵾk, uⱡ kai mbᵾ mint itᵾi! Enim ndi, wamp mbᵾ, mel mat ngᵾk kᵾn, punt rok yant ngui ngᵾngeing nᵾk, pili nᵾpᵾlᵾi mon! Uⱡ mbᵾ, pep rok eng ndam, enim nga puⱡ wamp mbᵾ, memp kai mat tetᵾm mbᵾ, wote ting. Wote, enim Got Oⱡa Nuim ei nga kangambuⱡa mel muⱡeing. Wote, uⱡ kit mbᵾ etᵾk, Got kᵾn angge ni nandᵾk etmin wamp mbᵾ, Got ndi, numan minal ku ngurum. 36Enim nga Got Tipam ndi, wamp pora, kont kurum uⱡ ei mel, enim ndi, wamp mbᵾ pora, i ku etᵾk, kont minal kᵾⱡᵾi!

Wamp Mat Nga Uⱡ Eng Mbᵾ, Enim Ndi, Kᵾmp Ti Nᵾtᵾi

37Wote Jisas ndi, ik ti wamp mbᵾ, kundpa nimba mel, “Enim ndi, wamp mat nga uⱡ kit eng mbᵾ, kᵾmp ti nᵾtᵾi mon! Wote Got ndi, enim kᵾmp tᵾmba. Enim ndi, wamp mat nga uⱡ kit mbᵾ, wak rundangina kᵾn, wote Got ndi, enim nga uⱡ kit mbᵾ, wak ku rondᵾmba. 38Enim ndi, mel mat ou ndupa, wamp mbᵾ ngᵾng ndam, wote Got ndi, enim mel mat ou ndupa, kᵾmp tᵾpa mel kai mat ngangga, peka romba. Wote, pi rok mana tangina kᵾn, oⱡa oi nimba ei mel kapⱡa. Enim ndi, mel mat wamp ngurmin to ni mel ku, Got ndi enim i ku etpa ngumba. 39Jisas ndi, ik ek ti ropa, nimba mel, “Mong ti wamp ti ndi, kapⱡa mong ti wamp ti, nombuⱡa mam ora ndumba, ei mon! Ei mel enggil wamp raⱡ kunda, kut ila mana pinggil. 40Kangambuⱡa ti ndi, elim nga ik mbo wu ei, kapⱡa tᵾpa mana ndui nandᵾmba mon! Kuimp tᵾpa man ik pilpa tᵾpa pora ndupa kᵾn, wote ik mbo wu ei mel kapⱡa moⱡmba. 41Nambuⱡ emel, nim ndi, ᵾngᵾn nga ᵾi moⱡ kel ti, mong waⱡ ila tetᵾm ei, kandkᵾn nᵾkᵾn purᵾn. Wote, nim nga mong waⱡ ila, nde koⱡmung mam ti, peta ropa petᵾm ei, pilkᵾn nᵾtᵾn nda? 42Nim nga mong waⱡ ila, nde koⱡmung mam ti, peta ropa tetᵾm ei, kᵾni nakᵾndkᵾn kᵾn, nambuⱡ emel, ᵾngᵾn nga mong waⱡ ila ᵾi moⱡ kel ei, tᵾkᵾn mundun pilkᵾn nᵾtᵾn nda? Nim wamp kai ti, molkᵾn kᵾn, wamp ei kondkᵾn nᵾtᵾm nda? Unt, nim nga mong waⱡ ila, nde koⱡmung mam ei, kuimp tekᵾn tᵾkᵾn mundkᵾn kᵾn, wote ᵾngᵾn nga mong waⱡ ila, ᵾi moⱡ kel ei, kandkᵾn tᵾkᵾn mundun,” nitim.

Nde Kit Kᵾⱡ Ndi, Nde Mong Kai Ti Rui Narᵾrᵾm

43Wote Jisas ndi, ik ti nimba mel, “Nde kai kᵾⱡ ndi, nde mong kit mat rui narᵾrᵾm mon! Wote, nde kit kᵾⱡ ndi, nde mong kai mat rui narᵾrᵾm, mon! 44Wamp mat ndi, nde ei nga, nde mong rorum ei ndi, kit muna, kai ei unt kandᵾk pᵾtmᵾn. Ei nga, ruwa rᵾⱡwa ila neka kai ei, rui narᵾrᵾm mon! Wote, rakᵾm ila ru keningina kai ei, rui narᵾrᵾm mon ku. 45Wote, wamp kai mbᵾ ndi, numan kai mbᵾ nga puⱡi mundmong orunga pendᵾk kᵾn, uⱡ kai mbᵾ mint etmin. Wamp kit mat ndi, numan kit mbᵾ nga puⱡi mundmong orunga pendᵾk kᵾn, uⱡ kit mbᵾ etmin kᵾⱡ, mundmong rukᵾr orunga, tepa oⱡa oⱡnga kᵾn, keta ila nᵾk ekit ndurmin,” nitim.

Wu Raⱡ Nga Manga Raⱡ Rakrᵾnggil Ei Mel

46Wote Jisas ndi, nimba mel, “Nambuⱡ emel, na ‘Wu Nuim, Nuim’ nᵾk, mbi mundᵾnmin? Wote enim ndi, na nga ik nᵾnt kᵾⱡ, pilik pep rui narᵾnmin ei ka! 47Wamp nam ti, na kᵾn omba, na nga nᵾnt ik mbᵾ, kum tepa pilpa, pep ropa em ndam, wamp ei nga puⱡ ei na ndi, enim kᵾn nᵾmp mot nduimp. 48Wamp ei, wu ti manga rakᵾmba pilpa, unt mᵾi ila kut tᵾpa mana mba kᵾn, ku mam mbᵾ, kandpa tᵾpa kᵾn, pol ila mang rakᵾpa mepa oⱡa urum. Wote, kona ndamᵾng tᵾma ropa, nu kui omba, kᵾpkᵾ ropa etᵾm ei kᵾn, manga ei omba, mana pi napᵾtᵾm, mon! Nambuⱡ emel, wamp ei ndi, manga ronduⱡ ei, ku pol ila rakrᵾm ei ndi, gi nimba anggᵾtᵾm. 49Wote, wamp nam ti ndi, na nga ik nᵾnt mbᵾ, kum tepa pilpa, pep rui narᵾm ndam, wamp ei wu ti, elim nga manga ei, oⱡa mᵾi pol ila mendpᵾⱡ, rakpa mondrum ni mel kapⱡa. Wote, kona ndamᵾng tᵾma ropa, nu kui omba, kᵾpkᵾ mam mat, ropa etᵾm ei kᵾn, manga ei, tᵾkrᵾpa mint ᵾⱡmbᵾⱡ nimba, mana petᵾm,” nitim.